توپراغیما یازدیغیم شعر

کیپریک وئریر

نفس آلیر

             هردن گؤلؤر

             هردن آغلاییر

توپراغیما یازدیغیم شعر

وئریلیرسه قاناد توتوب اوچاجاقدیر

زنجیرلری قیراجاقدیر

مزاریمدا یاتاجاقدیر

توپراغیما یازیلان شعر.

                               لیلا کحالی

من بیر شعر یازان کیمی

یوردومون سیر دفترینه

سانکی گؤزل بیر نشانلی

بخت ائوینه

خالچاسالیب

   ناقیشلاییر.

                 ساحیل آذر

ناسیل چیخار قارانلیقلار آیدینلیغا

                                         ناظیم حکمت

                       دوقتورزهتابی نین «شاهین زنجیرده » کیتابیندان

من اؤزوطنیمی اؤزدیاریمی

آزاداؤلکه لره قاتابیلمه دیم

آرزو یوخولاریم منی آییتدی

یوخولارایچینده یاتابیلمه دیم

آزادلیق یوردومدا دولاشدی یاد- یاد

من آزادلیق اولدوم اؤزگه لر آزاد

دیلیمی قیلینجلا دوغرادی جلاد

دوغرانمیش دیلیمی آتا بیلمه دیم

آه چکدیم دردلر دیندی دردیندن

قوپدم مهره - مهره اؤزتملیمدن

اللریم اوزولدوقارداش الیندن

سونرا دا قارداشا چاتا بیلمه دیم

گونش اویمانمادی قارابختیمده

آرزومون قیلینجی پاس آتدی قیندا

ان عناد واختیمدا ،گوجلو واختیمدا

گوجسوز د.شمنیمه باتا بیلمه دیم

هامی اؤز سسینی سسلره قاتدی

منیم قیشقیریغیم آغزیمداباتدی

اؤلکه لر بؤیودو،بیرلشدی، آرتدی

من ایسه بؤیویوب آرتا بیلمه دیم

                               سهراب طاهر

من کیمم بورادا؟کیمسه منی تانیمیر.

من کیمیم؟ کیمسه دیلیمی قانمیر.

ائله بیل تانری ایشتباه ائیله ییب،

جان وئرنده منه!.

من کیمیم؟

نییه بس ایستکله باخانداخلقه،

باخشیم هئچ کیمسه یه تانیش گلمیر؟

نه ائیله ییم، محبت ائتسم سه ده،

کیمسه منی قانمیر،منی دوشونمور.

یازکیمی آغلاییب،گول کیمی گولسم،

محبت ائیلمیر،عشقه اینانمیر؟

ائله بیل سنده منیم کیمی سن.

سنده بیلمیرسن کیمسن؟هارادانسان؟

اولمایا سنده هله بیلمیرمی سن،

نییه بو دنیایا آیاق قویموسان؟

اورگیم اوستونه الینی بیر قوی،

گؤرورسن قلبیم نئجه چیرپینیر؟

سورغوما؟«هن »جاواب وئرسن

بیللم کی غریب دوشوبسن سنده،

اؤزائلیندن، دیلیندن،دیاریندان.

منیم دیلداشیم!

غم یئمه،داریخما.

قاراگونلرگئدر.

گؤره سن بیزیم بوآغیردردیمیز،

آیریلاراوچون ده آغیرگلیر؟

آختاراق بیزتاپاق اونلاری.

بیرلشه ک، اویاداق بیزیاتانلاری.

بوراخاق اؤزگه نی،دوستلاری توتاق.

شیرینی گؤسته رک،آجی نی اوداق.

یادائلدن،یادیئردن، بیریول اوزوله ک.

بیراولاق،دوشونه ک بو دردلری.

توتاق بوسئوگینی،آتاق اؤزگه نی.

                               «ابولفضل بجانی »

دئمیره م ائللریم ائللردن باشدی

منیم مسلکیمده منیم یولومدا،

ملت لرهامیسی دوستدور،قارداشدی.

آنجاق بیر سئوزوم وارمن ده انسانام

دیلیم وار،خالقیم وار،یوردوم یووام وار،

یئردن چیخمامیشام گؤبه لک کیمی

آدامام حاققیم وار،ائلیم اوبام وار

                                       بولود قره چورلو(سهند)