ایسته رم غملی وطوفانلی گئجه یولچولارا

بیر فانوس تک یادا قطب اولوزو تک

رهبر اولام

ایسته رم یای گونو چؤللرده آخار

بیر سو اولوب

دوم - دورو گؤز یاشی تک

یولدا چوخور ایچره دولام

ایسته مم نقش ونگاریم قالا

شعریم اوخونا

ایسته رم بیر سیزی حسرت تک

اورکلرده قالام

اونو دورسا منی ائل

چکمه سه تاریخ آدیمی

ایسته رم آی تکی

یورد اوسته

گئجه بیر شوق سالام

                               حبیب ساهر

 وطن ساری گئدن یوللار

سئوینر قیزلار، اوغوللار

بیر گون سیزدن کئچه بیلسم.

 گولر عؤمرون آیی، گونو

تبریزده ووصال کوچونو

ابدی لیک آچا بیلسم.

 شادلیغیم توتار هر یئری

دنه دولان سونبوللری

اؤز الیمه بیچه بیلسم.

 سئوینیر قوشلاردا بئله

قوشلار کیمی دوغما ائله

قانادلانیب اوچا بیلسم.

 نغمه - نغمه دنیزم من

تبریزین بوز چشمه سیندن

اووچ- اووچ ایچه بیلسم.

وطن ساری گئدن یوللار

سئوینر قیزلار اوغوللار

بیر گون سیزدن کئچه بیلسم .

بیر گون سیزدن کئچه بیلسم... .

                                           مدینه گلگون