کیمه دئمه لی ییک دردیمیزی بیز

دیل بیلن کیمدی سؤز آنلایان کیمدی؟

اسیر بیر ملته محکوم بیر ائله

قایغی چکن کیمدی ،آغلایان کیمدی.

کورا گئجه - گوندوز یقین کی بیردیر،

نه دن قورخورام، قوی دئییم سؤزومو

منکی باخار کورام ،قویون دوستاق بان،

هئچ اسیر گه مه سین اویسون گؤزومو.

دیلیمی، دالیمدان چیخارتسالاردا،

قوی قارداش دردیمی دئییم باری بیل

گونئی دن- قوزئیه ،غربدن -شرقه.

هانسی خالقی گؤردون بیزیم تک ذلیل؟

دئمیرم دنیادا اسارت یوخدور

چوخ یئره سونگو تاخمیش استعمار،

آنجاق بیزیم کیمی ازیلن آزدیر،

هاردا حاق وئرمز وار حاق تاپیلماز وار!

میللی آزادلیقلار اولسادا

هریئرده، هریاندا آدی بو عصرین

نه ائتمک (( دونیانی بوغدا توتسادا،

کهلیین روزیسی چینقیلدیر))همین

بو شرف ، بو شوکت ،بو قدرت ،بوشان

هارا دوغورداندا بیزه عار اولسون!

حیاتین آمانسیز بو قانونو وار،

تعصب سیز ملت گرک خوار اولسون.

میللی تعصب دن دانیشدیم اولسون

اصلینی ایتیرنده حرامزادادیر،

مرد اوغول وطن-ین حاقیین ایتیمز،

وطن انسانلارا ان بویوک آنادیر.

قویون محکوم اولوم ملت چی لیگه،

دونیادا ملتین سئومه ین کیمدیر؟!

دیلین ،ائلین یوردون تالان ائتمسه لر

آجییب باشینا دؤیمه ین کیمدیر؟!

گرک گؤزلریندن گؤز اؤورته هر کس

قاغا یوواسینا یاناشسا اگر،

نییه وطنیمی سئومه ییم نییه؟

من بیر قارغادان دا اسگییم مگر؟

من دئمیریم اوستون نژاددانام من

دئمیریم ائللریم ائللردنباشدی

منیم مسلکیمده منین یولومدا،

ملت لرهامیسی دوستدور، قارداشدی.

چاپماق ایسته میره م من هئچ ملتین،

نه دیلین نه یئرین نه ده امه یین

تحقیر ائتمه ییرم، هده له میره م

کئچمیشین ، ایندیسین، یاگله جه یین

من آییرما ییرام آیری سالمیرام،

قارداشی ،قارداشدان، آروادی اردن

آنانی بالادان، اتی دیرناقدان،

اوره یی،اورهکدن ،قانادی پردن