انسانلیق بیرلیگی ایده آلیمدیر،

قارداشلیق یولداشلیق ابدی باریش

دونیادا ان بؤیوکآرزولاریمدیر.

آنجاق بیر سؤزوم وار من ده انسانام

دیلیم وار، خالقیم وار ،یوردوم یووام وار،

یئردن چیخمامیشام گؤبه لک کیمی

آدامام حاققیم وار ائلیم اوبام وار

قول یارانمامیشام یاراناندا من

هئچ کسه اولمارام نه قول نه اسیر

قورتولوش عصری دی انسانا بو عصر

اسیر اولانلارین بوخوون کسیر.

ای دوغما ائلیمین ناموسلو اوغلو،

آغلاما گؤزونون یاشینا قربان

گلدیین او دوغما عزیز دیارین

اولوم تورپاغینا داشینا قربان

سندن گیلئیلیدیم، دیلیم لال اولسون

قارداش گیلئیلنسهقارداشا نئیلر!

آتالار دئمیشدیر:دونیادا انسان.

همیشه اومدوغو بیر یئردن کوسر

نه ائتمه لی ((دردلی دئیینگن اولور))

اگر چوخ دانیشدیم باغیشلا منی.

بوقدره قوناغی داریخدیرمازلار

بیلمیرهم اینجیدیب یورموشام سنی

بیرآزاد سن دانیش دیلیوه قوربان

دانیش ائل اوبادان دانیش وطندن،

ایلش قوی ایستکلیدوغما خالقیمین،

عطیرینی، ایینی، اییله ییم سندن.

بو سنسن گلیسن گؤزلریم آیدین

یئنه گئده جکسن لابد وطنه،

یئنه ده ارمغان ایسترسن مندن

بیلمیره م ،بیلمیره م نه وئریم سنه؟

قلبیمی گؤزومو ایلک سفر وئردیم،

لایق لی بیر زادیم یوخدور بیر داها،

آنجاق بیر قورو، بوش جانیم وار قارداش

یئری گلسه وئرره م ، وئره رم اونودا!

...

ایسته قارداشلاریم سس وئرسین منه،

سؤزوموزدهحاقدیر ،یولوموزدا حاق

حقیقت یولودور انسانین یولو،

ناحقی حاققینا تاپشیراجاق

                                  بولود قره چورلو(سهند)