آراشدیردیق باشین ، دیبین

بیردن بیره، باخدیق گؤردوک

اؤیؤندمسیز بیر گؤزلونو،

او یولسوز، او تولونو

غریبه بیر توکان آچیب

ماتاحینی، توکوب ساچیب

سیلاح وئریر ، جانلار آلیر،

پیچاق وئریر، فانلار آلیر،

هر طرفه آتین چاپیر

آختاریر بیر قودوز تاپیر

ورهولادیر ،یاساق وئریر،

خیفتان وئریر، یاراق وئریر

قودوردوبان ایشه چکیر!

میلتلری شیشه چکیر!

السیزلرین،

مظلوملارین،

جانیخدیریر، جانین آلیر.

شوشه - شوشه قانین آلیر!

من او گوندن ایناندیم کی،

سینه لردن - سینه لره

آتالاردان ، بابالاردان

بیزه چاتان افسانه لر

چوخدا بئله یئرسیز دئییل

بو سوزلرده دریالار وار.

دریالارجا معنالار وار.

رادیولار هر نه دئسه

کیم نه دئسه - نه سؤیله سه

((کیتابلاریم)) هر نه یازسا

بوسؤزلردن ،

کیم یول تاپسا - ((کیم یول آزسا ))

بیر داها من

تانمیشام - تانیمیشام!

عصریمیزین ،

((بیر گؤزلوسون)).

((تپه گوزون)).

هارالاردا

هادا- هاردا

.......

هر تورپاقدا، هر دیاردا تانیمیشام او غدداری

اوقودوزو، او کافتاری.

جلادلارا سردار اولوب

سروراولوب ، سالار اولوب انسانلاری بوغور آسیر

میلتلره، کسیم -کسیر.

چاشتاسینا مین شوشه قان !

ناهارینا بیش یوز اینسان !

دیش فیجیردیر ، قان - قان دئییر

قان ایچدیکجه قان ایسته ییر! ....

بولود قره چورلو (سهند )